😃ठाह ई कोनी पड़ियो
कीकर बित्यो जमानो
कीकर बीती उमर।
ठाह ई कोनी पड़ियो।
काई लादो,कांई खादो,
काई लिदो,कांई दिदो,
ठाह ई कोनी पड़ियो।
कठे कमायो,कठे गमायो,
कितरा आया,कितरा गिया,
ठाह ई कोनी पड़ियो।
बाळपणो बित्यो,जवानी बीती,
गेडी पकड़ी,बूढापो आयगो,*
ठाह ई कोनी पड़ियो।
काले तक टाबर गिणीजतो,
आज दादो, नानो हुयगो,
ठाह ई कोनी पड़ियो।
कोई केवे नांव कमायो,
कोई केवे नांव गमायो,
पर ¡सच्ची बात रौ!
ठाह ई कोनी पड़ियो।
मायता री सुणी,
टाबरा री सुणी।
पर म्हारी कुण ई सुणी?
ठाह ई कोनी पड़ियो।
लुगाई केवे संबळ जावो,
थोड़ा मिनख व्हे जावो,
इतरा दिन मैं कांई हो?
ठाह ई कोनी पड़ियो।
मोट्यारपणा सूं आज तक,
गधा रे ज्यू लदियों,
पग फाडा पड़गा।
ठाह ई कोनी पड़ियो।
टाबर केवे छाना माना बैठ जावो,
थाने ठाह कोनी पड़े,
म्हे जुण पूरी कीदी…?
ठाह ई कोनी पड़ियो।
धोला व्हेगा बाल,
लटक गिया गाल,
मुंडो पोपळॉ व्हेगो,
ठाह ई कोनी पड़ियो।
समै पलटीयो,मिनख पलटीया,
कितरा छूटा,कितरा साथे रिया,
ठाह ई कोनी पड़ियो।
काले तक मसकरिया करतो,
सायनो संग।
आज डोकरियो व्हेगो।
ठाह ई कोनी पड़ियो।
घर रौ लोन,गाड़ी रौ लोन,
टी.वी रौ लोन,मोबाईल रौ लोन,
चुकावता चुकावता रिटायर व्हेगो।
ठाह ई कोनी पड़ियो।
रोब,रुतबो,गाड़ी,बंगला,
नौकर चाकर,ठाट पाट,
कद माळीपना उतरगा।
ठाह ई कोनी पड़ियो।
मिनख केवेला,
अबार तो बैठो हो हथाई में,
भायलो जातो रैयो।
ठाह ई कोनी पड़ियो।
दान कर,मान कर,
श्रम कर,धरम कर,
मजा ले ले जिंदगी रा।
पछे केवेला,
ठाह ई कोनी पड़ियो।
